Vaco truvanno 'na casciaforte!
E andivinate pe' ne fà che?
Non tengo titoli,
Non vivo 'e rendita,
Non ci ho un vestito pe' ccuollo a mme!
Ma 'a cascia mi necessita,
Pe' fforza ll'aggi' 'a tenè!

Ce aggi' 'a mettere
Tutt' 'e llettere
Che mi ha scritto Rusina mia,
'Nu ritratto (formato visita)
D' 'a bbonanema 'e zì Zufia,
'Nu cierro 'e capille,
'Nu cuorno 'e curallo
Ed il becco del pappagallo
Che noi perdemmo nel ventitrè.

Sono ricordi che in cassaforte,
Sulo llà dinto t' 'e ppuò astipà.
Quando mi privano
Del companatico,
Io 'ngotto e zitto senza sferrà.
Lo so! La vita è tragica,
Ma 'a cascia… me ll'hann' 'a dà!

Ce aggi ' 'a mettere
Tutt' 'e llettere
Che mi ha scritto Rusina mia,
Il mozzone di una stearica
(Conficcato nella bugia),
'Na bambola 'e Miccio,
'Na lente in astuccio
E una coda di cavalluccio
Che mi ricorda la meglia età!

Vaco truvanno 'na casciaforte!
Ma a qua' casciere ce 'o vvaco a ddì?
Certe reliquie,
Cierti cimeli,
Si 'e ttiene 'a fore, ponno sparì!
San Casimiro martire,
'Sta cascia, famm' 'a venì!

Ce aggi' 'a mettere
Tutt' 'e llettere
Che mi ha scritto Rusina mia,
'Na cartella (di lire dodici),
Rilasciata dall'agenzia,
'Na maneca 'e sicchio,
'Na crastula 'e specchio,
'Na corteccia di cacio vecchio
E un fracchesciasso color cakì!