Gioja bella,
Pe' te vedè
C'aggio fatto
Nun può sapè!

Si putesse parlà 'stu core
Quanta cose vulesse dì,
Ma, chiagnenno pe' lu dulore,
Io m' 'o scippo pe' nn' 'o sentì!

Napule e nenne belle,
Addio v'avimm' 'a dì…
Sentite 'a retirata?
Ce n'avimmo da trasì!

Dice 'a gente
Parlanno 'e me,
Ca si parto
Mme scordo 'e te!

A 'sta gente 'stu core mio
Pe' risposta tu fa' vedè;
E dincello ca si part' io
Tiene 'mmano 'nu pigno 'e me.

Napule e nenne belle,
Addio v'avimm' 'a dì…
Sentite 'a retirata?
Ce n'avimmo da trasì!

Gioja bella,
Te ll'aggi' 'a dì
Ca dimane
S'ha dda partì!

Statte bona, può stà sicura,
C' 'a medaglia voglio turnà!
A 'stu core tienece cura,
Si nun torno, nun 'o jettà!

Napule e nenne belle,
Addio v'avimm' 'a dì…
Sentite 'a retirata?
Ce n'avimmo da trasì!