'Na casarella 'a parte 'e Marechiare
'A voglio 'ncopp' a 'na viarella 'nfiore…
'Na canzona, luntano, 'e marenaro…
Vicino 'na figliola tutta core
Dint' a 'sta casarella a Marechiare.

È chisto 'o meglio suonno 'e tutt' 'e suonne
Ca sulo Marechiare me pò dà…
'O mare faccefronte, attuorn' 'e ffronne:
Mare e campagne pe' mme fà sunnà!…

Veco turchino 'o mare, a primma sera,
Comme sò ll'uocchie 'e chi voglio assai bene…
Veco verde 'e campagne a primmavera
Comm' 'e speranze quanno ammore vene
Cantanno e suspiranno a primma sera…

E vene ammore 'ncoppo Marechiare,
Dint' a 'sta casarella addò stongh'i'…
E veco 'nnanz' a me comm' a 'nu faro
Dduje uocchie belle: ll'uocchie tuje, Marì!

I' vaco spierto comm' 'o marenaro
Ca niente spera e nun è maje sicuro;
Ma si torna 'stu core a Marechiare
Passa 'o presentimento triste e scuro…
E mm'arreposo comm' 'o marenaro.

E torna 'o meglio suonno 'e tutt' 'e suonne
Ca sulo Marechiare me pò dà:
'O mare faccefronte, attuorn' 'e ffronne:
Mare e campagne pe' mme fà sunnà!…