'E giesummine 'e Spagna
Ne tengo 'nu ricordo;
Maje e po' maje m' 'e scordo
Sempe ca sto a campà.
Pe' ll'oro 'e tutt' 'o munno
I' nun 'e cagnarraje,
Manco co ll'uocchie mieje,
Manco co 'a libbertà.

Ve pare 'a fantasia?…
'Sti sciure prelibbate
Sapite chi m'ha date?…
I' nun v' 'o pozzo dì.

Tutt' 'e ffigliole belle
'E miez' a 'stu quartiere
Veneno a schiere a schiere
E stanno a suspirà.
Corrono li palomme
'Ncopp' a 'sti sciure amate,
Nce restano azzeccate,
Se scordano 'e vulà.

Ve pare 'a fantasia?…
'Sti sciure prelibbate
Sapite chi m'ha date?…
I' nun v' 'o pozzo dì.

'E 'sti sciurille care
Ne faccio 'na curona,
Si essa m'abbandona
Sacc'io che n'aggi' 'a fà.
Me chiudo 'a cammarella,
Co 'e sciure m'addurmento,
E aspetto lentamente
Chest'anema 'e lassà.

Ve pare 'a fantasia?…
'Sti sciure prelibbate
Sapite chi m'ha date?…
I' nun v' 'o pozzo dì.