'E rragazze mò stanno in ribbasso,
Fann' 'a caccia p' havè 'nu marito…
E pe' ffarse passà 'stu prurito
Lloro 'o sanno quant' hann' 'a suffrì!
Nun sò cchiù chilli tiempe 'e 'na vota,
Quanno ll'ommo jeva appriesso â gunnella,
E pe' ll'uocchie 'e 'na femmena bella,
Mò nce vò, se faceva sparà!

'E rragazze c' 'o cannelotto,
Vann' ascianno 'o ggiuvinotto,
Quanno ll'hann' avuto sotto
Nun s' 'o fanno scappà cchiù!

'O prugresso ha purtato cchiù lusso,
'O guverno ha mettuto cchiù tasse:
Chi vulite ca mò se 'nzurasse?
Quacche pazzo surtanto 'o ppò ffà!
Seh! Purtateve 'a femmena â casa!
'Int' a niente ve fa 'na famiglia,
Quann' è ddoppo, che bella quatriglia,
C' 'a Miseria vulite abballà!

'E rragazze c' 'o cannelotto,
Vann' ascianno 'o ggiuvinotto,
Quanno ll'hann' avuto sotto
Nun s' 'o fanno scappà cchiù!

Piccerè, 'a capite 'a canzona?
Senz' 'e llire nisciuno ve sposa!
Abballate! Facite 'e sciantose!…
'A furtuna ll'avit' 'a scetà!
State lustre cu ll'aco e cu 'o ffilo…
Mò arrivate c' 'o fierro e 'a cazetta,
Si 'un facite vulà 'a machinetta…
Piccerè, v' 'a putite sciuscià!

'E rragazze c' 'o cannelotto,
Vann' ascianno 'o ggiuvinotto,
Quanno ll'hann' avuto sotto
Nun s' 'o fanno scappà cchiù!