Chillu turzo 'e mio marito
Nun se pò cchiù suppurtà!
Ll'aggi' 'a cosere 'o vestito:
Mm'aggi' 'a mettere a cantà!

Tutto è pronto! Sto aspettanno
'Na scrittura p' 'a firmà:
Nun appena che m' 'a danno,
Vaco fore a debuttà!

Ho scelto un nome eccentrico:
"Ninì Tirabusciò"
Oh! Oh! Oh!
Oh! Oh! Oh!
Addio, mia bella Napoli,
Mai più ti rivedrò!…
Oh! Oh! Oh!
Perderai Tirabusciò!

Ne cunosco tante e tante
Ca nun sò cchiù meglio 'e me…
E cu 'e llire e cu 'e brillante
Sò turnate da 'e tturné…

'A furtuna, s'è capito,
'Ncopp' ê ttavule se fa!…
Ca fatiche e ghiett' 'acito,
Che risorse può sperà?…

Aiz' 'a vesta, smuovete!
È ll'epoca ch' 'o vvò…
Oh! Oh! Oh!
Oh! Oh! Oh!
Addio, mia bella Napoli,
Mai più ti rivedrò!…
Oh! Oh! Oh!
Perderai Tirabusciò!

Pe' cantà nun serve 'a voce,
È 'o partito ca nce vò…
Po' 'e ccanzone miette 'ncroce
Ca faje "bisse" quante vuò!

Dai il tuo cuore 'ncopp' â piazza
Ai più ricchi "abitué"…
Vide po' si 'un fanno 'a mazza
Ll'ate artiste 'nnanz' a tte!

È chesta 'a vera tattica
'E 'na sciantosa 'e mò…
Oh! Oh! Oh!
Oh! Oh! Oh!
Addio, mia bella Napoli,
Mai più ti rivedrò!…
Oh! Oh! Oh!
Perderai Tirabusciò!