Bona gè, vuje che 'mpace durmite,
'Sta canzona mò nun 'a sentite;
'Sta canzona è mmiscata c' 'o chianto
E a chi va mò s' 'a sciala a ddurmì.

'Na guagliona senza core,
Doppo tanto e tanto ammore,
M'ha lassato, m'ha 'nchiantato
Senza dirme, nèh, pecché?

Vola, vò, canzona mia,
Ca a cantà i' nun 'a 'ngarro,
Bona gè, cu 'sta chitarra
Mèh, cantate appriess' a mme!

'Stu barcone addò spisso 'a parlavo,
Mentre 'a luna ch' 'e ragge 'a vasava,
Tutt' 'e ssere ccà sotto fermato
Quanta ccose senteva 'e cuntà!

'Sta figliola senza core,
Doppo tanto e tanto ammore,
M'ha lassato, m'ha 'nchiantato
Senza dirme, nèh, pecché?

Vola, vò, canzona mia,
Ca a cantà i' nun 'a 'ngarro,
Bona gè, cu 'sta chitarra
Mèh, cantate appriess' a mme!

Bona gè! Si dimane 'mbarcone
S'affacciasse 'na bella guagliona,
Nce dicite c'ha acciso a 'nu core
Dint' ô mmeglio che steva a campà.

Chistu core è 'o mio core…
Doppo tanto e tanto ammore,
Ll'ha lassato, ll'ha 'nchiantato
Senza dirle, nèh, pecché?

Vola, vò, canzona mia,
Ca a cantà i' nun 'a 'ngarro,
Bona gè, cu 'sta chitarra
Mèh, cantate appriess' a mme!